«Целинный» заманауи мәдениет орталығында Jailau. Qazaq Välsi атты ерекше көрсетілім өтті. Бұл – Rassul Social, Abzal Seidin, Assem Sapargali мен Qanaker есімді төрт дизайнердің басын қосқан Törteu тобының бірлескен жобасы.
Көрермен бұл жолы кәдімгі дефилені емес, ішкі еркіндік пен мәдени жады туралы нағыз театралды толғанысты тамашалады. Кеңістік екі түрлі әлемге бөлініп кеткендей: модельдер төменде жүрсе, олардың төбедегі төңкерілген бейнелері бейне бір өз өткенімен тілдесіп жатқандай әсер қалдырды.
Осы бір айнадағы бейнелер арқылы дизайнерлер адам жанындағы қабылдау мен қақтығыс арасындағы нәзік тепе-теңдікті көрсетуге тырысқан.
Кештің шырайын Роза Рымбаеваның жанды дауыстағы өнері аша түсті. Оның орындауындағы «Заман-ай» әні екі дәуірді жалғап тұрған алтын көпірдей естілді.
Айтпақшы, бұл жобаның тарихы мұнымен аяқталмайды. Енді Art Days жобасы аясында Esentai Mall сауда орталығында Jailau көрмесі ұйымдастырылмақ.