8 наурызға орай қайратты аруларға арнауымыз
Оның жел сүйген еркін бейнесінде жеңістері мен алдан күткен үмітінің елесі бар. Ол ер-азаматтардың қонағы емес, қатары, теңі. Оның рухы алапат, көзі өткір. Болаттай берік әрі қалқан, әрі семсер – сұлулық пен жойқын күштің иесі. Ал тыртығы – асқан шыдамдылық белгісі, тәніне түскен әрбір сызық – мұқалмас жігерінің дәлелі. Ол ештеңеден қорықпайды, өйткені үрейлену жау қолына қару ұстатумен бірдей. Оның жүрегі еркіндік ырғағымен бірге соғады, ал жаны тағдыр тауқыметінен жасымайды. Ол – жауынгерлер патшайымы, түнек басқан әлемдегі үміт шамшырағы. Оның өмірі қандай қиыншылық болса да, батылдық арқылы өшкенді жандыруға болатынын еске салады.