Бұл оқиға 1912 жылдың жазында Парижде болған еді. Сән үйінің бас парфюмері Жак Герлен Сена өзенінің үстінен өтетін әйгілі Пон-Нёф (Pont-Neuf) көпірімен келе жатып, ғажайып табиғат құбылысына куә болады. Күн ұясына батып, бірақ қараңғылық толық түсе қоймаған сол бір қас-қағым сәтте Париж аспаны мен өзен суы тұтасып, тұңғиық көк түске боялған екен.
Француздар бұл мезгілді l’heure bleue – «көк сағат» деп атайды. Импрессионист суретшілер секілді Жак Герлен де көзбен көргенін емес, жанмен сезгенін, сол бір тылсым сәттің романтикасын құтыға сыйдырғысы келді. Әлемдік парфюмерия тарихындағы ең жұмбақ әрі поэзияға толы L’Heure Bleue жұпары дәл осылай дүниеге келген.
Дәуірдің үні
Бұл хош иіс Еуропаның Шығысқа ынтыға қараған кезеңін мінсіз бейнелейтін. Бастапқы нұсқасы анис пен бергамоттан ашылып, жүрегінде шегіргүл мен гелиотроп ойнайтын, ал соңы ваниль мен иристің терең шлейфіне ұласатын күрделі шығыс-гүлді композиция еді. Гурмандық бағыт (тәтті, жеуге жарамды ноталар) сәнге әлдеқайда кеш келгенімен, Жак Герлен ваниль мен мускусты аса шеберлікпен үйлестіріп, парфюмериядағы «тәбет ашатын» жылы ноталардың алғашқы іргетасын қалап кетті.
Атақты төңкерілген жүрек пішінді қақпағы бар құтының өзі – бөлек тарих. Оның авторы Жак Герленнің жиені әрі талантты дизайнер Жан-Батист Лартиг болатын. Бүгінде коллекционерлер хош иісі тотықпай, дәл сол қалпында сақталған ескі құтыларды табу үшін eBay желісінде жүздеген еуросын санап беруге дайын.
Аңыздың жаңа болмысы
Арада ғасырдан астам уақыт өткенде Guerlain осы аңызға қайта оралды. Бас парфюмер Дельфин Джелькке классиканы жай ғана жаңарта салу емес, сол баяғы «көк сағаттың» тылсым сезімін бүгінгі күннің стилінде жеткізу міндеті жүктелді. Жаңа композицияға мөлдір тазалық сыйлайтын озон аккорды қосылып, ол ирис пен апельсин гүлімен шебер жымдасты. Алайда басты жаңалық – мүлдем жаңа ирис тинктурасы еді.
Жалғыз ирис үшін жұмсалған үш жыл
Тинктура – табиғи шикізаттың бүкіл байлығын сақтап қалу үшін оны спиртке тұндыратын Guerlain-нің ең көне әрі бірегей технологиясы. Осы бір ғана ирис тинктурасын жасап шығаруға тұтас үш жыл уақыт кеткен. Дельфин ең сапалы тамырсабақтарды Италиядан тапқанымен, одан хош иіс алу оңайға соқпады.
Бұл тұста Францияның Орфен қалашығында орналасқан тарихи Guerlain фабрикасының шеберлері көмекке келіп, екі ғасырлық тарихы бар ескі тәсілдерді заманауи үлгіде қайта жаңғыртты. Осылайша жаңа L’Heure Bleue нұсқасының жүрегіне айналған ерекше ирис тинктурасы дүниеге келді.
Мінсіз формула бірден табылған жоқ. Дельфин үнемі ізденісте болды. Бірде ол әуежайда келе жатқанда, бейтаныс әйел тоқтатып, үстіндегі ғажайып иістің атын сұрайды. Бұл Дельфин үшін нағыз ақиқат сәті еді: егер жұпар зертханадан тыс жерде адамдарды осыншалықты еліктірсе, демек, мақсаттың орындалғаны. Ол дәл осы нұсқаны түпкілікті етіп бекітті.
Алматыдағы «көк сағат»
Жаңа жұпардың таныстырылымы Алатау бөктеріндегі табиғаты әсем Swissôtel Wellness Resort Alatau Almaty кешенінде өтті. Халықаралық кешке Орталық Азия елдері мен Кавказ аймағынан арнайы қонақтар жиналды. Айнала толықтай «көк сағат» атмосферасына еніп, көкшіл және лаванда реңктерімен көмкерілді. Тіпті дастарқандағы нанның өзі лаванда түсті болып пісірілсе, көгілдір сорбет мұз кесегінің ішінде ұсынылды.
Кештің шарықтау шегі табиғаттағы нағыз «көк сағат» уақытымен тұспа-тұс келді. Қонақтар көл жағасына шығып, жаңа L’Heure Bleue жұпарын себінді де, шампан бокалдарын көтеріп, тілек тіледі. Guerlain өкілдері дәл осы үш шарт орындалса, тілектің міндетті түрде қабыл болатынына уәде берді. Ең бастысы, Guerlain табынушыларының ортақ тілегі қазірдің өзінде орындалды – ұлы жұпар ортамызға қайта оралды.
