«Қыз-келіншектердің бәрі тек бетінің қамын ойлайды», – деп күрсінді косметологым кушеткада жатқанымда. Әңгіме барысында біз әйелдер жиі ұмыт қалдыратын дене бөліктерін – декольте, қол ұшын және, әрине, мойынды сөз еттік. Дәрігердің айтуынша, әйелдер бетін жарқыратып қою үшін жылдар бойы еңбектенеді, мінсіз маңдай мен әдемі бет сүйегі үшін қаншама уақыты мен ақшасын аямайды. Алайда иектен сәл ғана төмен орналасқан тұсқа мүлдем мән бермейді. Ең қызығы сол – дәл осы елеусіз қалған бөліктер уақытқа тез беріліп, адамның нақты жасын жасыра алмайды.
Өз басым мойынға ерекше мән беремін. Бәлкім, бұл мінсіздікке деген өзімнің ішкі ұмтылысымнан болар, бірақ адамдармен сөйлескенде макияжынан бұрын мойнына көз жүгіртіп, ондағы әрбір сақина тәрізді қатпарды немесе терінің босаңсып қалғанын еріксіз байқап тұратыным бар.
Неліктен мойын бетке қарағанда тез қартаяды? Мойын терісінде май бездері дерлік жоқ, сол себепті мұнда әжім өте тез түседі. Оған қоса, терінің қатты құрғап, ылғалсыздануы да дәл осы тұста анық байқалады. Тері астындағы май қабатының жұқалығы соншалық, тері сәл ғана салбыраса, бірден көзге ұрады. Қарапайым сөзбен айтқанда, мұнда теріні тіреп, ұстап тұратын артық май қоры жоқ.
Мойынның қартаюын не тездетеді?
Денені тік ұстамау
Смартфоннан бас алмайтын қазіргі әдетіміз бізге қымбатқа түсіп жатыр. Басымыз үнемі экранға қарай еңкейіп тұрғандықтан, мойын терісі жиырылып қалады. Уақыт өте келе бұл қатпарлар терең әжімге айналады. Бұған арқаны бүкірейтіп жүретін әдетті қосыңыз – міне, содан келіп бет пішінінің контуры салбырап шыға келеді. Айтпақшы, балериналардікіндей мінсіз тік арқаның өзі бұл мәселеден толық құтқара алмайды. Платизманың (мойынның басты бұлшықеті) өз мінезі бар: ол стресстен, түрлі мимикадан немесе тым ауыр жаттығулардан тырысып, спазмға ұшырауы мүмкін.
Тіс қатарының бұзылуы
Иектің мойынға қатысты бұрышы тістің дұрыс орналасуына да тікелей байланысты. Егер оны уақытында ретке келтірсе, косметологтарға жұмсалатын қыруар қаражатты үнемдеп қалуға болады.
Ақуыз тапшылығы
Ақуыз – ағзаның басты құрылыс материалы. Ал терінің тығыздығы мен серпімділігін сақтайтын коллаген мен эластин де осы ақуыздан тұрады. Сондықтан тамақпен бірге түсетін ақуыз – олардың түзілуіне қажетті негізгі іргетас.
Платизма
Бұл – сүйекке бекітілмейтін жалғыз мимикалық бұлшықет, ол тікелей сіңірден басталады. Ол өте жұқа, жалпақ және бет контурынан сәл жоғары орналасып, басқа бұлшықеттермен астасып жатады. Платизма спазмға ұшырағанда, беттің төменгі бөлігі қатты зардап шегеді. Себебі ол астыңғы ерінді және ауыздың бұрышын төмен түсіретін бұлшықеттермен ұштасады. Тырысқан кезде платизма олардың бәрін төмен қарай тартады. Беттің төменгі бөлігінің салбырап, деформациялануы осыдан шығады. Оған қоса, бұл бұлшықет терімен тығыз байланысқан, сондықтан ондағы кез келген өзгеріс сырт келбетімізге әсер етіп, әжім болып көрінеді.
Күн сәулесі
Мойын – күн сәулесіне өте осал бөлік. Өйткені мұнда зиянды сәулелердің бетін қайтаратын меланоциттер өте аз. Сол себепті, күн астында көп жүргендіктен, мойын терісі бетке қарағанда тезірек босап, салбырай бастайды.
Бұл жағдайда не істеу керек?
Денені тік ұстап, бастың дұрыс орналасуын қадағалау
Бұған арқаға арналған түрлі жаттығулар (йога, пилатес, емдік дене шынықтыру, күштік жаттығулар) жақсы көмектеседі: арқа неғұрлым тік болса, басты тік ұстау да соғұрлым оңай. Бірақ жаттығуларды бапкердің бақылауымен жеке таңдап, орындаған абзал.
Ультракүлгін сәуледен қорғану
Мойында теріні тік ұстап тұратын эластин талшықтары көп кездеседі. Күн сәулесінің әсерінен бұл талшықтар үзіліп, тері салбырай бастайды.
Ылғалдандыру, тығыздау және терінің қорғаныс қабатын қалпына келтіру
Мойын терісі де тұрақты күтімді қажет етеді. Ол үшін арнайы құрал іздеп әуре болудың қажеті жоқ – бетке жағатын кремдерді мойынға да қолдана берсеңіз болады. Антиоксиданттар (С дәрумені), теріні қатайтатын пептидтер, құрамында ретинолы аз құралдар да артық етпейді. Бірақ тым күшті құралдардың соңынан қуудың қажеті жоқ – кейде құрамында пептидтері бар қарапайым кремнің өзі жеткілікті болып жатады.
Косметология
Мойынға қатысты ең жиі кездесетін шағымдар негізінен платизма жұмысының бұзылуына, «Венера сақиналарына» және терінің босаңсуына байланысты.
Косметологтар платизмамен жұмыс істегенде ботулинотерапияны қолданады. Ботокс бұлшықеттің қозғалысын тежеп, оны босаңсытады. Көпшілігі платизма босаңсығаннан кейін жалпы бет пішінінің жоғары қарай тартылғанын (лифтинг әсері) байқап жатады.
Мұның сыры мынада: платизмаға қарама-қарсы жұмыс істейтін – беттің ортаңғы бөлігін көтеретін бет сүйек бұлшықеттері. Сондықтан платизма босаңсыған кезде, бет сүйек бұлшықеттері сәл жоғары көтеріліп, біз тартылған әдемі бет-әлпетті көреміз.
Венера сақиналары – мойындағы көлденең қатпарлар, бірақ олар әжім емес. Бұл қатпарлар бала кезден байқалуы мүмкін немесе 30-дан асқан соң пайда болады. Егер бұл сақиналар сізге аса кедергі келтірмесе, оларға тиіспей-ақ қойған дұрыс. Ал егер сырт келбетіңізге ұнамаса, оларды филлермен толтырады. Көп жағдайда бір ғана процедурамен керемет нәтижеге жету мүмкін емес, кейде екі-үш сеанс қажет болады. Нәтиженің қанша уақыт сақталатыны адам ағзасына байланысты. Біреулер оның тез кетіп қалатынына шағымданса, енді біреулер үшін нәтиже 8-12 айға дейін сақталады. Егер мойында тері астындағы май қабаты жеткілікті болып, сақиналар өте терең болса, олармен үйреніскен оңай. Себебі филлер тіндердің арасына тез сіңіп кетіп, ешқандай нәтиже бермеуі әбден мүмкін.
Мойын терісінің сапасы (құрғақтығы, босаңсуы, жұқаруы) көңіліңізден шықпаған жағдайда, оны жасартудың жоспары үш қадамнан тұрады: ылғалдандыру, қатайту, жиырылту. Косметологтардың арсеналында биоревитализация, коллаген препараттары, коллаген стимуляторлары және аппараттық процедуралар (инелі RF, лазермен тегістеу) бар. Мұны неден бастау керек? Ол терінің бастапқы жағдайына байланысты, ал процедуралардың ретін тек дәрігер шешеді.
Мойынға келгенде мамандар бірден аппараттарды қолдануға асықпайды. Өйткені лазермен тегістеу де, инелі RF те – теріні зақымдайтын процедуралар. Аппараттар теріге (маманның бақылауында болса да) зақым келтіреді, ал мойын терісі өте жұқа болғандықтан, өте ауыр жазылады. Сондықтан бұл әрдайым күткен нәтижені бере бермейді. Мінсіз нәтижеге қол жеткізу үшін бәрін кезең-кезеңімен жасаған дұрыс: алдымен инъекция арқылы теріні дайындап, содан кейін ғана аппараттық әдістерге көшу керек.