Хейли Бибер, Зои Кравиц және Маргарет Куолли сияқты танымал жұлдыздардың мінсіз келбетін жасайтын визажист Нина Пак енді өзінің жеке косметикасын шығаруға қызу кірісіп кеткен сияқты. Beauty Independent басылымы таратқан ақпаратқа сүйенсек, ол декоративті косметика, макияж жаққыштары мен түрлі аксессуарлар шығару үшін Nina Park тауар белгісін тіркеуге өтінім берген.
Тағы бір өтінім Lipshadow атауымен берілген. Бұл атаудың астарында нақты қандай өнім жасырынып жатқаны әзірге беймәлім. Дегенмен визажистің жанкүйерлері бұл жаңалықтың ерін бояуға тікелей қатысы бар екенін іштей жақсы сезіп отыр.
Жалпы, Нина Пак әлеуметтік желілерде дәл осы өзі ойлап тапқан Nina Park Lip техникасының арқасында қалың көпшілікке танылды десек, қателеспейміз. Ол макияж жасаған кезде ерінді қарындашпен қатаң сызып қоймайды. Оның орнына салқын қызғылт, шабдалы және жидек реңктерін қабат-қабатымен жұқалап жағып шығады. Осы әдіспен ол ерінге өте табиғи әрі тартымды көлем сыйлайды.
Нина Пак өзінің жеке өнімдерін шығару жоспары туралы алғаш рет қаңтар айында Vogue Korea журналына берген сұхбатында айтып қалған болатын. Әзірге танымал визажист болашақ брендтің құрамына нақты не кіретінін де, оның сатылымға қашан шығатынын да құпия ұстап отыр.