Сағат 11:00-де басталатын бұл ауқымды шара заманауи Қазақстан жайлы жазылған ең үздік роман авторының есімін көпшілікке жариялау мақсатында мәдениет пен әдебиет саласының көрнекті қайраткерлерінің басын қоспақ.
Салтанатты жиынның бағдарламасы ҚР Мәдениет пен ақпарат министрінің құттықтау сөзімен ашылады. Ізінше осы сыйлыққа қаржылай қолдау көрсеткен меценат Тимур Турлов сөз алмақ. Оған қоса жобаның негізін қалаушы Ерлан Асқарбеков жиналған қауымға арнайы үндеу жасай отырып, байқаудың бесінші, сондай-ақ алдағы алтыншы маусымына енгізілетін негізгі жаңалықтарға тоқталады. Сонымен қатар ол тәуелсіз әдеби марапатты одан әрі дамыту жоспарларымен бөліспек.
Естеріңізге сала кетейік, Mecenat.kz – бір топ әдебиет жанашырларының бастамасымен құрылған тәуелсіз марапат. Бұл байқауға заманауи Қазақстанның шынайы болмысы мен рухын бейнелейтін, бұрын-соңды еш жерде жарияланбаған қазақ немесе орыс тіліндегі романдар қабылданады. Байқау жеңімпазын оқырмандар ашық дауыс беру арқылы анықтайды. Ал басты жүлде – авторға өмір бойы ай сайын төленетін 500 доллар көлеміндегі тұрақты қаржылай сыйақы.