Бекітілген мастер-планға сәйкес, курорт аумағында 16 аспалы жолмен қамтылған 60 шақырымдық тау шаңғы трассасы төселетін болады. Қар жамылғысының сапасын сақтау мақсатында беткейлердің 70 пайызы жасанды қарландыру жүйелерімен жабдықталмақ. Оның ішінде, тіпті нөлден жоғары температурада да қар өндіруге мүмкіндік беретін Snow Factory технологиясы қолданылмақ. Трассалар күрделілік деңгейіне қарай мынадай үлесте бөлінген:
- 10,6 % – жасыл (бастаушылар үшін);
- 50,3 % – көк;
- 22,7 % – қызыл;
- 16,4 % – қара (кәсіби мамандар үшін).
Болжам бойынша, курорт күніне 10 мың шаңғышыны қабылдауға қауқарлы, ал жылдық туристік ағын 9 миллион адамға жетеді деп күтілуде.
Курортқа баратын негізгі бағыт – «Медеу» спорт кешенінен басталатын жаңа аспалы жол. Табиғи ландшафтқа келетін әсерді барынша азайту мақсатында бұл жол небәрі 6 тіреуіштен ғана тұратын болады. 40 адамға дейін сыйдыратын вагондар жолаушыларды межелі жерге жылдам жеткізуді қамтамасыз етпек. Автокөлік жүргізушілері үшін Үлкен Алматы шатқалы арқылы (Науаи көшесі бойымен) жеке маршрут қарастырылғанымен, ол жерден тек қоғамдық көліктер мен электромобильдердің ғана өтуіне рұқсат берілмек.
Жобаның басты мақсаттарының бірі – тау шаңғымен сырғанауды Алматы тұрғындары мен өзге аймақ қонақтары үшін қолжетімді ете түсу. Қолданыстағы демалыс орындарымен салыстырғанда, Almaty Superski баға саясатын барынша демократиялық негізде қалыптастыруды көздеп отыр.
Курорт аумағында 6,5 мың орындық қонақүй кешендерін салу жоспарланған. Алайда мұнда жеке виллалар мен жабық коттедждердің бой көтеруіне тыйым салынбақ: жоба негізінен отбасылық демалыс пен бұқаралық туризмге бағытталған. Ғимараттардың биіктігі төрт қабаттан аспайтын болады.
Аталмыш мастер-планды Давос, Куршевель және Аспен сияқты әлемдік деңгейдегі курорттарды құруда тәжірибесі мол Pas Grau International (Андорра) компаниясы әзірлеген. Жобаны іске асырумен «Бәйтерек» мемлекеттік холдингі айналысып, қаржыландыруды Қазақстанның Даму Банкі қамтамасыз етпек. Құрылыстың нақты құны әзірге бекітілмегенімен, инфляцияны ескере келгенде, бұл сома бұрын болжанған 430–440 миллион доллардан жоғары болатыны анық.
2026 жылдың басында жоба бойынша қоғамдық тыңдаулар өткізілуі тиіс. Көкжайлауды игеру мәселесі 2000-жылдардан бері талқыланып келе жатқаны мәлім. 2018–2019 жылдары экологиялық белсенділердің қарсылығынан кейін тоқтап қалған жұмыстарды ресми органдар бұл жолы барынша ашық әрі байыпты тұрғыда жүзеге асыруға уәде беріп отыр.