Америкалық Vogue журналы саяхаттауға арналған әлемдегі ең тартымды өлкелердің жыл сайынғы рейтингін жариялады. «Редакторлар 2025 жылы барған ең үздік 14 бағыт» тізімінде әлемдік классикалық локациялармен қатар Қазақстан да бой көрсетті. Біздің еліміз бұл рейтингтегі орынды бауырлас Қырғызстанмен бөлісіп тұр.
Мақала авторының жеке әсеріне сүйенсек, оның Орталық Азиядағы сапары Алматыдан басталған. Ол Алматыны қарама-қайшылықтарға толы қала ретінде суреттейді: асқақ Іле Алатауының етегіндегі кеңестік бульварлар мен заманауи дәмханалар, дәстүрлі қазақ дүкендері мен еуропалық стиль астасып жатыр. Авторға, әсіресе, ұлттық асхананың жауһары – Auyl мейрамханасы ерекше әсер қалдырған. Онда дәм татқан бешбармақ тағамы шетелдік қонақ үшін күтпеген гастрономиялық жаңалық қана емес, қазақ қонақжайлылығының шынайы символына айналған.
Десе де, нағыз саяхаттың сиқыры қала сыртында басталса керек. Автор Алматыдан кейін Қырғызстанға ат басын бұрып, биік таулы Соңкөл көліне атпен саяхат жасаған. Жұлдызды аспан астындағы киіз үй лагерінде түнеген сәттерін ол «мәңгі жадыңда қалатын, жан дүниеңді жаңғыртатын сапар» деп бағалайды.
Орталық Азиядан кейін редакторлар назары Еуропаның тылсым өлкелеріне ауды. Мәселен, жылтыр журналдарда сирек кездесетін Румыния бағыты биыл жоғары бағаланды. Саяхатшыларды Карпат тауларының табиғаты мен «Дракула» туралы аңыздарға арқау болған қамал ғана емес, сонымен қатар талғаммен қалпына келтірілген тарихи иеліктер де қызықтырған. Олар бүгінде эксклюзивті бутик-отельдер ретінде туристерді қабылдап жатыр.
Туристердің көптен бергі сүйікті мекендері де бұл жолы биіктен көрінді. Мәселен, Сардиния өзінің мөлдір жағажайларымен қатар, «нөлдік шақырым» философиясын ұстанатын агротуризмімен баурап алды: мұндағы ірімшіктен бастап шарапқа дейінгі барлық өнімдер бір шақырым радиуста ғана өндіріледі. Ал Копенгаген өзінің жазғы велосипедті демалыс атмосферасымен және La Banchina айлағы сияқты жайлы орындарымен тәнті етті. Францияның Шампань аймағы болса, әрбір бокалы ғасырлар бойы жалғасып келе жатқан мерекелік рәсімнің бөлшегіндей көрінетін Royal Champagne қонақүйі арқылы сипатталды.
Тізімнің соңы оқшау демалысты жаны сүйетіндерге арналған камерлік орындармен түйінделген: Нью-Йорктегі жасырын Форт-Тилден жағажайы, Флоридадағы орхидеялармен көмкерілген The Moorings Village вилласы және Джорджия штатындағы Саванна қаласының мистикалық жұмбақ атмосферасы.