Австралия лигасы Sydney Super Cup 2026 турниріндегі ең әдемі алты голдың рейтингісін жариялады. Бірінші орынды «Уэстерн Сиднейге» қарсы матчтың алтыншы минутында Дастан соққан гол иеленді. Қазақстандық вингер қарсыластың алаңында допты қабылдап алып, айып алаңына зырқырап басып кірді де, қақпаның жоғарғы бұрышына дәл көздеп, жойқын соққы жасады. Бұл – Сәтпаевтың «Челси» жейдесіндегі алғашқы голы.
Бұл кездесуде лондондық клуб 6:4 есебімен жеңіске жетті. Дастан гол соғып қана қоймай, командасының екінші нәтижелі шабуылына да үлес қосты – 38 минутта командаласы Дариу Эссугу мергендік танытты. Қазақстандық футболшының мұндай жарқын дебюті «Челси» жанкүйерлерін тәнті етті. Олар әлеуметтік желілерде жас талантты жарыса құттықтап, жылы лебіздерін жаудырып жатыр.