Apple TV стриминг сервисі көрермен көптен күткен «Тед Лассо» хикаясының төртінші маусымы 2026 жылдың жазында көрерменге жол тартатынын ресми түрде жариялады. Сондай-ақ, бұл хабармен бірге түсірілім алаңында түсірілген алғашқы фотосуреттер де көпшілік назарына ұсынылды.
Сюжет желісі Тед Лассоның (Джейсон Судейкис) айналасында өрбиді. Ол екінші дивизиондағы әйелдер футбол командасына жетекшілік ету үшін «Ричмонд» клубына бас бапкер ретінде қайта келеді. Жарияланған кадрлардан Тедтің өзіне адал көмекшісі, бапкер Бердпен (Брендан Хант) бірге жаңа әріптесімен (Таня Рейнольдс) танысып жатқан сәтін байқауға болады.
Оқиға өткен маусымның соңында Тед аттанған Канзас штатында басталып, кейін сюжет желісі қайтадан Англияға ауысады. Түсірілім жұмыстары 2025 жылдың шілдесінде Канзас-Ситиде басталып, қазіргі уақытта Лондонда жалғасып жатыр.
Жобаға Судейкистен бөлек, басты рөлдерді сомдаған Ханна Уоддингем, Джуно Темпл және Бретт Голдстин сияқты жұлдыздар қайта оралды. Сонымен қатар, актерлік құрам Таня Рейнольдс пен Джуда Мака секілді жаңа есімдермен толықты. Жаңа маусымның атқарушы продюсері қызметін «Эмми» сыйлығының иегері Джек Бердитт атқарады.