1. «Иллюзия обмана 3» (Алдамшы елес 3)
- Шығу күні: 13 қараша
- Қайдан көруге болады: кинотеатрларда
«Төрт салт аттыны» сағындыңыз ба? Олардың да сізді сағынғаны сөзсіз. 2013 жылы басталған хикаяның сүйікті кейіпкерлері қайта оралды. Жұлдызды құрамға (Джесси Айзенберг, Вуди Харрельсон, Дэйв Франко) Айла Фишер қайта қосылды. Екінші бөлімде оның кейіпкері Хенли Ривз (орнын Лиззи Каплан басқан еді) көрінбеген болатын. Жанкүйерлер актрисаны қайтаруды өтініп сұраған соң, ол ақыры келісімін берді. Үшінші бөлімде көрермендер аңызға айналған командамен ғана емес, иллюзионистердің жаңа буынымен де қауышады. Бізді таңғалдыру қиын болып көрінгенімен, актерлер бұл жолы бас айналдырарлық трюктер мен сиқырдың жаңа деңгейін көрсетеді деп күтілуде.
2. Landman («Землевладелец»), 2-маусым
- Шығу күні: 16 қараша
- Қайдан көруге болады: Paramount+
Тейлор Шеридан драмасының екінші маусымында «M-Tex» мұнай компаниясының иесі (Джон Хэмм) кенеттен қаза тауып, билікті Томми Норрис (Билли Боб Торнтон) тізгіндейді. «Йеллоустон» ранчо өмірін, ал «Талса патшасы» қылмыс әлемін қалай көрсетсе, Landman де Техастағы мұнай бизнесін дәл солай бейнелейді. Шоу өзінің фирмалық стилін сақтап қалған: жалпақ жиекті қалпақтар және жылы, «құм түстес» визуалды стиль. Екінші маусымда жобаға Деми Мур оралды, ал Пол Томас Андерсонның культтік «Мұнай» (There Will Be Blood) фильмімен ұқсастық бұрын жай ғана сезілсе, енді ол ашық түрде көрініс тапқан.
3. Wicked: Part Two
- Шығу күні: 21 қараша
- Қайдан көруге болады: кинотеатрларда
Баррикаданың екі жағында қалған бұрынғы құрбылар драмасының жалғасы. Эльфаба (Синтия Эриво) қуғында жүріп әділетсіздікпен күресін жалғастырса, Глинда (Ариана Гранде) биліктегі жүйенің бет-бейнесіне айналады. Глинда сыртқы сән-салтанат пен той қамына алданғанымен, ішкі ар-ұждан дауысы оған маза бермейді. Осы сезім оны ескі досымен татуласуға итермелейді. Бірақ бұл әрекет олардың жолын біржола екіге бөледі. Дороти кейіпкерінің қосылуы мен жаңа музыкалық тақырыптар оқиға желісін әйгілі Оз елінің сиқыршысы туралы ертегімен тығыз байланыстырады. Фильм премьерасы келеңсіз оқиғасыз өткен жоқ. Ариана Грандеге қарай жүгірген жанкүйерді көргенде, Синтия Эриво әріптесін қорғау үшін лезде қолын созып, ереже бұзушыны жанарымен «өртеп жібере жаздады». Бұл оқиға бірден желіде тарап, жанкүйерлер актрисаның адалдығына тәнті болды.
4. Stranger Things, 5-маусым
- Шығу күні: 26 қараша
- Қайдан көруге болады: кинотеатрларда, Netflix
Netflix-тің басты феномендерінің бірі саналатын дәуір аяқталуға жақын. Стримингтік платформа өзінің ең табысты франшизасын назардан тыс қалдырмаса да (спин-офф жобалар, соның ішінде жапондық нұсқасы да дайындалып жатыр), Он бірінші (Милли Бобби Браун) қатысатын негізгі сюжеттік желі ресми түрде өз мәресіне жетті. Финалдық маусым үш бөліммен шығады: біріншісі 26 қарашада жарық көрсе, екіншісі – Рождество күні, ал қорытынды бөлімі – 31 желтоқсанда көрсетіледі.
5. «Зверополис – 2»
- Шығу күні: 26 қараша
- Қайдан көруге болады: кинотеатрларда
Disney көрерменді жануарлар мекендейтін жарқын әлемге қайтарады. Режиссерлер Буш пен Ховардтың тандемі тағы да шеберлік танытып, егжей-тегжейлі ойластырылған әрі тапқыр оқиғаны ұсынады. Джуди Хопс пен Ник Уайлдтың дуэті жаңа сынаққа тап болады: олар мәжбүрлі терапияға жіберіледі. Енді беделдерін қалпына келтірудің жалғыз жолы – Зверополис тұрғындары аңыз деп санайтын көгілдір сылдырмақты жыланды ұстау. Алғашқы бөлімдегідей, сиквел де өзекті әлеуметтік сатира мен киноклассикаға жасалған сілтемелерді шебер үйлестірген.
6. Wake Up Dead Man (Достать ножи: Воскрешение покойника)
- Шығу күні: 26 қараша
- Қайдан көруге болады: кинотеатрларда, Netflix
Детектив Бенуа Блан (Дэниел Крейг) Райан Джонсон франшизасының үшінші бөлімінде оралады. Бұл жолы оқиға шағын қалада өрбиді. Ондағы шіркеуде жас әрі өршіл діни қызметкер (Джош О’Коннор) мен оның тәжірибелі әріптесі (Джош Бролин) арасында қақтығыс туындайды. Блан келгеннен кейін көп ұзамай дін қызметкерлерінің бірі жұмбақ жағдайда қаза тауып, куәгер ретінде төрт жергілікті тұрғын тартылады. Бұл тергеу детектив үшін ең күрделі әрі қауіпті іс болғалы тұр.
7. Emily in Paris, 5-маусым
- Шығу күні: 18 желтоқсан
- Қайдан көруге болады: Netflix
Жаңа маусымда Эмили Купер (Лили Коллинз) Париж көшелерін Рим алаңдарына айырбастайды. Кейіпкер Agence Grateau маркетингтік агенттігінің жергілікті өкілдігін басқару үшін Италияға көшеді. Дегенмен шоудың мәні өзгеріссіз қалды: көрерменді қайтадан романтикалық хикаялар, елдің көрікті жерлеріне саяхат және бітпейтін сәнді киімдер күтеді. Бұл «мәдени көші-қон» тіпті дипломатиялық дау тудырды: Эммануэль Макрон «Эмилиді қайтару үшін күресетінін» айтқанда, Рим мэрі Роберто Гуальтьери француз президентіне босқа уайымдамай, маңыздырақ мемлекеттік істермен айналысуға кеңес берді.
8. Avatar: Fire and Ash («Аватар: жалын мен күл»)
- Шығу күні: 19 желтоқсан
- Қайдан көруге болады: кинотеатрларда
«Аватардың» үшінші бөлімінде басты қарсылас өзгереді: егер бұрын қауіп адамдардан төнсе, енді Салли отбасы на'видің дұшпан руларымен бетпе-бет келеді. Бұған дейін Джеймс Кэмерон Пандораның мүлде жаңа тұрғындары пайда болатынын хабарлаған еді. Олардың қатарында жанартау маңында мекендейтін жауынгер Күл тайпасы (Мангкван) бар. Сондай-ақ медузаға ұқсайтын алып тіршілік иелерімен саяхаттайтын көшпенді Жел саудагерлері (Тлалим) де қосылады. Бұл жолы оқиғаны Джейк (Сэм Уортингтон) пен Нейтиридің (Зои Салдана) кіші ұлы Ло'ак (Бритен Далтон) баяндайды, ал оның есеюі хикаяның орталық тақырыбына айналады.
9. The Copenhagen Test
- Шығу күні: 27 желтоқсан
- Қайдан көруге болады: Peacock
Құпия агент Александр Хейлдің (Симу Лю) санасына қылмыстық элементтер еніп, оның көрген-білгенін бақылауға алады. Бұл Хейлді өз қызметінің алдында қауіпті тұлғаға айналдырса, қылмыс әлемі де өз артықшылығын жібергісі келмейді. Агентке сыртқы жаулармен күресе жүріп, ішкі хаосты тізгіндеуге тура келеді: оның санасы галлюцинациялар мен қорқынышты бейнелер тудырады. Визуалды хаос осы маусымда танымал болған «қолмен түсіру» тәсілі арқылы берілген. Жобаның продюсері – «Ара» (Пила), «Сиқыр» (Заклятие) және «Астрал» сияқты культтік хоррорлардың авторы Джеймс Ван. Бұл есімнің өзі жобаның шиеленісті әрі қорқынышты болатынын аңғартады.
