Оның өмірі өзі жасаған «шексіздік бөлмелеріндей» жұмбақ әрі ғажайып еді. Әлемді түрлі-түсті дөңгелектер арқылы танып, бейнелеу өнерінде тұтас бір ғалам құра білген Яёи Кусаманың жүрегі тоқтады. «Бұршақ бедерінің патшайымы» атанған суретші 2026 жылдың 14 тамызында Токио ауруханаларының бірінде 97 жасында өмірмен қоштасты. Бұл қаралы хабар бүгін оның жеке студиясының ресми сайтында жарияланды.
Өткен ғасыр мен жаңа мыңжылдықтың ең көрнекті тұлғаларының бірі саналатын Кусама жай ғана сурет салған жоқ. Ол заманауи өнердің шекарасын бұзып, өзіне ғана тән мүлдем жаңа көркемдік тіл ойлап тапты. Суретшінің қолтаңбасына айналған қайталанбас ою-өрнектері, аты аңызға айналған асқабақтары мен адамды тұңғиыққа тартып әкететін алып инсталляциялары оған әлемдік даңқ әкелді. Көпшіліктің оны Polka Dot Queen деп атауы да осыдан.
Оның қайталанбас туындылары Нью-Йорктегі MoMA мен Whitney Museum, сондай-ақ Лондондағы Tate Modern сияқты әлемнің ең беделді музейлерінің төрінен орын алды. Ал Токио қаласында суретшінің шығармашылығына толығымен арналған арнайы Yayoi Kusama Museum жұмыс істеп тұр.
Дегенмен, бұл ғажайып әлемді көру үшін мұхит асудың қажеті жоқ. Алматылық Almaty Museum of Arts коллекциясында суретшінің 2013 жылы жасалған әйгілі Infinity Mirror Room – Love is calling инсталляциясы сақтаулы, бұл оның мұрасы біздің мәдениетімізбен де тығыз байланысты екенін көрсетеді.