Таңғы ас кезіндегі қызғылт шарап, жазушыларға арналған авторлық коктейльдер мен брендтік кітап клубтары – мұның бәрі зияткерлік ойын-сауықтың жаңа форматына айналды.
Қысқы Алматы таңында қызғылт көбікті шарап ұрттай отырып, 12 әйелдің ортасында Жан-Поль Сартрдың «Жабық есік артында» пьесасын талқылау – өте талғампаз әрі күтпеген ермек. Мұнда жиналғандардың әрқайсысы философтың «Өзгелер – мен үшін тозақ» (L'enfer, c'est les autres) деген атақты тіркесін өздігінше саралап, қызу ой толғады. Misha деп аталатын кітап клубының кезекті отырыстарының бірі осындай сипатта өтті. Бұл жолы олар Nuala мейрамханасында бас қосты, бірақ жалпы алғанда кездесулердің орны жиі ауысып тұрады.
Клуб иесі Алина Ульянова алдағы уақытта Gruppo 63–пен серіктес болуды жоспарлап отырғанын айтады. Бұл жолы кездесулер кешкі форматта өтіп, тіпті болашақ авторларға арналған жазушылар клубы мен арнайы коктейль әзірлеу идеясы да іске асуы мүмкін. Алинаның театр саласына тікелей қатысы бар, сондықтан клуб отырыстары сценарлық қойылымды еске түсіреді: кешкі көйлек киген ханымдар мен футболка киген студент қыздар бір үстелде еркін шүйіркелеседі. Осыған дейінгі жиындарда олар Кафка мен Гётенің «Фаустын» талдады. Десе де, салмақты классикаға басымдық берілгенімен, пікірталас арасында «Сұрдың 50 реңкі» сияқты жеңіл тақырыптар да назардан тыс қалмайды.
Алина тек жеке кітап клубымен ғана айналыспайды, сонымен қатар куратор ретінде өзге брендтердің қауымдастығын дамытуға көмектеседі. Мәселен, қараша айының соңында қазақстандық Méssa бренді Sófa Club аясында әдеби кездесулерді бастады. Алғашқы жиын үшін Элена Феррантенің әйелдер достығы туралы «Менің ғажайып құрбым» атты романы таңдалды. Méssa қауымдастығы сырт көзге үлкен құрбылар тобына ұқсайтынын ескерсек, бұл таңдау өте символикалық болды.
Кітап клубтары – бүгінде әлемдік деңгейдегі тренд. Мысалы, Miu Miu Миланда, ал Chanel Парижіде Наоми Кэмпбелл мен Кейт Бланшеттің қатысуымен әдеби кештер өткізеді. Алматы үшін бұл мүлдем жаңа дүние емес: мұнда «Хунта», «Ленивые читатели» және басқа да клубтар бұрыннан жұмыс істеп келеді. Бірақ бұл – «неғұрлым көп болса, соғұрлым жақсы» дейтін жағдай. Сартрдың өзі кезінде «әлем әдебиетсіз-ақ өмір сүре берер еді» деп масаттана мәлімдесе де, әдебиетпен, әсіресе қызғылт шараптың аясында өмір сүру әлдеқайда қызықтырақ.