Алматыда Қазақстанның халық артисі, М. Лермонтов атындағы мемлекеттік академиялық орыс драма театрының беделді актері Анатолий Креженчуков 76-ға қараған шағында өмірден өтті. Өнер иесі соңғы уақытта ауыр дертпен алысып келген еді. Бұл хабарды оның театрдағы әріптестері әлеуметтік желідегі парақшаларында ресми түрде хабарлады.
Анатолий Креженчуковтың тағдыры Лермонтов театрымен тығыз байланысты. Ол 1973 жылы Құрманғазы атындағы Алматы мемлекеттік консерваториясын тәмамдаған бойда осы ұжымға қабылданып, жарты ғасырға жуық уақытын сахнаға арнады. Қырық жылдан астам шығармашылық жолында актер әлемдік классика мен заманауи драматургияда жүздеген кейіпкердің бейнесін сомдап, көрерменнің үлкен ілтипатына бөленді.
Оның актерлік өмірбаянында Горький, Островский, Чехов және Гоголь туындыларындағы рөлдері айрықша орын алады. Әсіресе, «Ревизордағы» Қалабасы мен Дон Хуан бейнелері көрермен есінде ерекше қалды. Ал қалың қауым оны Қазақстандағы алғашқы әрі ең танымал телехикая – «Тоғысқан тағдырлар» жобасындағы доктор Платонов рөлі арқылы таныды.
Әріптестері оның кәсібилігі мен еңбекқорлығын жоғары бағалайды. «Анатолий Креженчуков кәсібіне деген адалдығымен ерекшеленетін. Ол классикалық театр мектебінің дәстүрлерін сақтай отырып, отандық театр өнерінің дамуына үлкен үлес қосты», – деп жазды әріптестері.