Аянат көпқабатты мөлдір тюльден тігілген қызыл көйлек пен жабосы бар ақ блузка киіп, белін көк белбеумен буып, әсерлі қалпақпен толықтырған. Бұл бейне оның АҚШ-тың 250 жылдығына арналған «Lady America» атты жаңа фильміндегі образынан алынған. 2025 жылдың соңында Америкада түсірілген бұл туындыда Аянат басты рөлді сомдап, жақсылық пен жамандық арпалысқан заманда елдің басын біріктіретін қайратты әйелдің бейнесін сомдады. Актерлік шеберлігінен бөлек, ол костюм бойынша суретші ретінде де өнер көрсетіп, картинадағы барлық киім үлгілерін өз қолымен жасап шыққан. Фильм премьерасы АҚШ-тың Тәуелсіздік күніне орай, 4 шілдеде Американың барлық кинотеатрларында өтеді деп жоспарлануда.
Аянат Есмағамбетова мектеп қабырғасында жүріп-ақ «Көшпенділер» (2005) блокбастерінде басты рөлді ойнап, танымал болған еді. Қазіргі таңда ол АҚШ-та тұрып, өзінің Ayanat Skincare атты косметикалық брендін ілгерілетумен айналысуда. 2024 жылы актриса «Mannequin» драмасына түсіп, жақындарынан айырылып, манекен денесіне қамалып қалған әйелдің тағдырын шебер бейнелеген болатын.
