Netflix Warner Bros. Discovery компаниясын 82,7 миллиард долларға сатып алу туралы келісімге келді. Bloomberg басылымының хабарлауынша, осы ауқымды мәміле аясында платформа өзінің тікелей бәсекелесі – HBO-ны да өз қатарына қосады.
Ресми мәлімдеме жақын күндері жасалуы мүмкін. Алайда қазіргі деректерге сүйенсек, талаптар қатаң: егер келісім қандай да бір себеппен бұзылса, Netflix 5 миллиард доллар көлемінде өтемақы төлеуге міндеттеледі. Бұл ойындағы басты жүлде – контент. Мәміле нәтижесінде Netflix HBO-ның қазынасына, соның ішінде «Сопрано кланы», «Тақтар ойыны», «Friends» секілді культтік сериаларға және «Харри Поттер» франшизасына толық иелік етеді.
Маңызды нюанс: Warner Bros. меншігіндегі CNN, TBS және TNT сияқты танымал кабельдік телеарналар сатып алу келісіміне кірмеген. Олар жеке компания болып қайта құрылады деп жоспарлануда.
Warner Bros. активтерінің сатылуы – дәстүрлі теледидар дағдарысының заңды нәтижесі. Көрермендердің жаппай стримингтік сервистерге ауысуына байланысты медиагиганттың табысы азайып барады. Егер Netflix мәмілені сәтті аяқтаса, оның платформаларындағы жалпы аудитория саны рекордтық 450 миллион жазылушыға жетеді.
Айта кету керек, Warner Bros. мұрасына тек Netflix қана емес, Comcast және Paramount Skydance компаниялары да үміткер болған еді. Тіпті соңғысы бүкіл концернді қолма-қол ақшаға сатып алуды ұсынғанымен, жеңіс стриминг көшбасшысының еншісінде қалды.