Berat Mert Demir – DJ set
- Қашан: 18 тамыз, 21:00
- Қайда: Bla Bla Bar
- Құны: 30 000 теңгеден бастап
Апта басын түрік музыканты Берат Мерт Демирдің кешімен ашуға болады. Диджей-сет форматында өтетін бұл кеште әртіс нағыз би кешіне арналған бағдарламасын ұсынады. Іс-шараға билеттер қазірдің өзінде сатылымда.
Мұражайдағы арт-терапия
- Қашан: 20 тамыз, 19:00
- Қайда: «Яблоко» шығармашылық академиясы, Айманов көшесі, 126
- Құны: 20 000 теңгеден бастап
Мұражайдағы арт-терапия кеші өнерге өз сезіміңіз бен ассоциацияларыңыз арқылы үңілуге мүмкіндік береді. Екі сағат бойы қатысушылар өнер туындысын мұқият тамашалап, туындаған эмоцияларын, ойлары мен ішкі түйсіктерін талқылайды. Бұл формат тек ересектерге арналған.
Sezim Melodiasy
- Қашан: 20 тамыз
- Қайда: Central Stand-up Club
- Құны: 13 000 теңгеден бастап
20 тамызда Central Stand-up Club төрінде Sezim Melodiasy акустикалық кеші өтеді. Бұл іс-шара әуезді музыкалық бағдарлама мен камералық клуб форматының басын біріктіреді.
Park Live Almaty
- Қашан: 21-23 тамыз
- Қайда: Первомай тоғандары
- Құны: бір күнге – 40 000 теңгеден бастап; үш күндік абонемент – 120 000 теңгеден бастап
Осы аптаның басты оқиғасы – үш күнге созылатын Park Live Almaty фестивалі болмақ. Ауқымды шара 21-23 тамыз аралығында Первомай тоғандарында өтеді, ал оның басты хедлайнерлері Jack White, Gorillaz және The Offspring.
- 21 тамызда фестивальді Jack White пен The Kills ашады. Басталуы – 16:00.
- 22 тамызда сахна төріне Gorillaz, CeeLo Green, De La Soul және қазақстандық әнші Dequine шығады. Бұл күнгі бағдарлама 13:00-де басталады. Gorillaz тобы алматылықтарға The Mountain жаңа альбомындағы туындыларымен қатар, бұрыннан танымал хиттерін де орындайды.
- 23 тамызда фестиваль The Offspring тобының өнерімен қорытындыланады. Олармен бірге үндістандық Bloodywood метал-тобы және америкалық Glassjaw постхардкор-ұжымы өнер көрсетеді. Басталуы 13:00-ге жоспарланған.
I’ONE FEST
- Қашан: 21 тамыз, 18:30
- Қайда: Almaty Arena
- Құны: 11 000 теңгеден бастап
Almaty Arena сарайында Q-pop пен K-pop бағыттарының басын бір сахнада қосатын I’ONE FEST өтеді. Бағдарлама аясында Ninety One, Ziruza, I’ONE, сондай-ақ кореялық CLOSE YOUR EYES пен TNX топтары және Rocky өнер көрсетеді.
Ұйымдастырушылар бұл фестивальді екі түрлі музыкалық мәдениеттің тоғысуы деп бағалап, жаңа буын әртістеріне басымдық беріп отыр. Корей және қазақстандық поп-музыка тыңдармандары үшін бұл сол күні өтетін Park Live фестиваліне таптырмас балама бола алады.
«Жаңа музыка туралы» лекциялар легі
- Қашан: 22 тамыз, 17:00
- Қайда: «Целинный» заманауи мәдениет орталығы
«Целинный» орталығында «Жаңа музыка туралы» лекциялар легі жалғасын табады. Кезекті кездесу 22 тамыз сағат 17:00-де өтеді. Бұл курс еркін импровизация тарихына, белсенді тыңдау тәжірибесіне және эксперименталды орындаушылық өнерге арналған.
Бағдарлама аясында Полин Оливерос, Джон Кейдж, Корнелиус Кардью, Энтони Брэкстон сияқты эксперименталды музыка өкілдерінің шығармашылығы да талқыланады.
«Жерорта теңізінің дәмі: жүзімнен бокалға дейін» шарап дегустациясы
- Қашан: 22 тамыз, 19:00
- Қайда: IWINE сомелье мектебі, Достық даңғылы, 109
- Құны: 20 000 теңге
IWINE сомелье мектебінде Жерорта теңізі шараптарына арналған дегустация өтеді. Қатысушылар аймақтың ерекшеліктерімен танысып, сусындардың шығу тарихы мен мінезі туралы әңгімелейтін дәріспен қатар, шараптардың дәмін татып көре алады.
Media Basket Almaty
- Қашан: 23 тамыз, 16:00
- Қайда: Алматы
- Құны: 7 000 теңгеден бастап
Концерттен гөрі спорттық іс-шараларды ұнататындар үшін 23 тамызда Media Basket Almaty турнирі өтеді. Матчтың басталуы сағат 16:00-ге жоспарланған, билеттер қазір сатылымда.