Қазақстандық орындаушы Yenlik әйгілі A COLORS SHOW музыкалық шоуына қатысып, үлкен жетістікке қол жеткізді. COLORS – жұлдыздар түрлі-түсті фон алдында жанды дауыста ән шырқайтын Германияның танымал YouTube арнасы.
Yenlik бұл жобаға шақырту алған Қазақстанның тұңғыш әртісі болып, өзінің көптен күткен арманын орындады. «Ұсыныс түскенде қуаныштан жылап жібердім. Бұрын өзіміз өтінім беріп, одан нәтиже шықпаған еді, ал бұл жолы COLORS командасы мені өздері тауып алды», – деп ағынан жарылды әнші.
Орындаушының пікірінше, табыстың сыры – шынайылықта. Шоу ұйымдастырушыларын оның ерекше музыкасы мен жергілікті сахнаның үніне айналған қазақ тілі баурап алған көрінеді. Түсірілім жұмыстары небәрі екі сағаттың ішінде шағын әрі жайлы ортада өтті. Өнерпаздың таңдауымен қойылған ерекше түс оның шығармашылығының өзегі – «нағыз нәзік күшті» бейнелейді.
Шығарылымды мына қолжетімді сілтеме арқылы тамашалай аласыздар.