Кәсіпкерлер күні қарсаңында ұйымдастырылған бұл шара бизнес өкілдері мен сарапшылардың басын қосты. Форум аясында TikTok желісі «Атамекен» Ұлттық кәсіпкерлер палатасымен бірлесе отырып, платформаның шағын және орта бизнеске тигізетін әсері туралы зерттеу нәтижелерін жариялады. Оған қоса, мұнда панельдік пікірталас, TikTok-та парақшаны ілгерілету бойынша шеберлік сағаты және жергілікті брендтердің көрмесі ұйымдастырылды.
Зерттеу қорытындысына көз жүгіртсек, сауалнамаға қатысқан кәсіпкерлердің 70 пайыздан астамы TikTok желісін өз бизнесі үшін айына кемінде бір рет қолданады екен. Респонденттердің 88,3 пайызы платформаның жаңа тұтынушыларды тартуға таптырмас құрал екенін айтса, 73,3 пайызы оның бәсекелестер арасында дараланып тұруға көмектесетінін алға тартқан. Сонымен қатар, компаниялардың 57,8 пайызы өз табысының 5 пайыздан астамын дәл осы TikTok-тағы белсенділігімен тікелей байланыстырады. Осы орайда, платформадағы жарнамаға қаржы құятын кәсіпкерлердің қарасы да күн санап артып келе жатқаны байқалады.
Форумда бизнес өкілдері қысқа видеоларды кәсіпке қалай тиімді пайдалануға болатыны жайлы тәжірибелерімен бөлісіп, контент авторларымен жұмыс істеудің және өз тауарлары мен қызметтерін ілгерілетудің қыр-сырын айтып берді. Жиналған қауым цифрлық құралдардың қазақстандық кәсіпкерлерге жаңа тұтынушылар табуға, сатылымды арттыруға және жаңа нарықтарға шығуға қалай жол ашатынын қызу талқылады.