Өсу мүмкіндігі, белгісіздік және жарқын болашаққа деген сенім: жас суретшілер 2025 жылдан не күтетіні туралы әңгімелейді
Жылдың аяғы — қорытынды жасайтын, сондай-ақ адамдар жүрегіне сенім ұялатып, болашақты тағатсыздана күтетін, жоспар құрып, армандайтын кез. Адам жаңа жылға қарай алғаш қадам басқанда ойды түрлі образдар мен символдарға толтыратын белгісіздікке сүңгіп, батқандай болады. Бұл визуалды метафоралар адамды толғандырып, алдағы өзгерістерді толыққанды түсінуге мүмкіндік береді әрі абстракт ойларға пішін дарытады. Жас қазақстандық суретшілерді келер жылды өнер тұрғысынан талдауға шақырып, оны қандай символ не образ арқылы сипаттауға болатыны жөнінде сұхбаттастық.
Kokonja
Дария Нұртазина (Kokonja) — Ақмола облысының Жалғызқарағай ауылынан шыққан суретші, композитор әрі диджей. 2024 жылы Дарияның жетістіктері көп болды — суретші ZVUK кешінде өнер көрсетіп, Тбилисидегі New Beginnings x Group Exhibition экспозициясына қатысып, Ambujerba-мен бірге Kokomba көрмесін ұйымдастырды.
«Бұл сурет — «Жыл мезгілдері» атты абстракт образ, яғни қыс, көктем, жаз және күз. Алдымызда Христостың дүниеге келгенінен бастап есептегенде 2025 жыл тұр, XXI ғасырдың үшінші онжылдығының бесінші жылы. Әлі де Жердеміз, аспанымызда жұлдыздар жылтылдайды. Көк Жылан жылы келіп қалды. 2024 жыл бізге болашақтан жақсылық күткен еш пайдасы жоқ, тіпті зиян нәрсе екенін көрсетті. Жарқын болашаққа деген сенім мен үміт қана қалды. Үміті бардың жаны жай табады, ғашықтар бірге болады, бар проблемалар ақырында шешіледі».
Винченцо Ауджелло
Алматыдан шыққан жас суретші. 2024 жылдың қарашасында Faces Beyond атты жеке көрмесі өткен болатын.
«Картинадағы сәби жаңа өмірдің басын, болашаққа деген үмітті бейнелейді. Бұл образ қиындық пен өзгерістің артында жаңару және өсу мүмкіндіктері жататынын еске салады».
Саян Байғалиев
Шығыс Қазақстан облысының Бетқұдық ауылынан шыққан жас суретші. Forbes Kazakhstan-ның 2024 жылғы «30-ға дейінгі 30» атты жас көшбасшылар тізіміне кірген жан. Туындылары биыл Венецияда өткен Arsenale Nord іс-шарасында, сондай-ақ желтоқсанда ұйымдастырылған жеке Matte(r)reality көрмесінде ұсынылған болатын.
«Соңғы кезде елдің көзіне жиі түсетін образым қос қабырғасы есікке толы, соңы қараңғыдан көрінбейтін дәлізге айналды. Бұл дәлізде жарық жоқ, болашаққа тән белгісіздікке ұқсайды. Оның соңына дейін жеткім келмесе де, алға ұмтылуға мәжбүрмін».
Ambujerba
Тахир Яхьяров (Ambujerba) — Алматыдан шыққан жас суретші. 2024 жылы Kokonja-мен бірге ұйымдастырған Kokomba көрмесі өтті. Сонымен қатар 26 қаңтарға дейін созылатын «Қағаз көрмесіне» қатысты.
«Осы образды өзім таңдағаныммен, оның мән-мағынасы мен айтпақ ойын еш сипаттай алмаймын. Адамдардан да, өзімнен де, Жаңа жыл сынды абстракт категориядан да ешнәрсе күтпеймін. Қазіргі таңдағы тілектерім қарапайым қажеттіліктен аспайды».
