Көрмеде Аман Бақтығалиевтің елу жыл ішінде салған үздік туындылары қойылады
12 тамызда Әбілхан Қастеев атындағы Ұлттық өнер мұражайында суретші Аман Бақтығалиевтің туғанына 80 жыл толуына орай мемориалдық көрме ашылады. Экспозицияда суретшінің 1970-жылдардан 2020-жылдарға дейін салған 70-тен астам графикасы мен кескіндеме туындылары ұсынылады. Бұл – шебердің Ұлттық мұражайдағы екінші жеке көрмесі, алғашқысы 2006 жылы өткен болатын.
Аман Бақтығалиев – 1980 жылдары ұлттық өнердің жаңа бейнелеу тілінің дамуына үлес қосқан көрнекті қазақстандық суретшілердің бірі. Ол Атырау облысында дүниеге келіп, Алматы мен Ленинградта білім алған. Гоголь атындағы көркемсурет училищесінде сабақ беріп, ҚазКСР Суретшілер одағының мүшесі және хатшысы болған.
Көрмеде «Менің өлкем» және «Жеңіс күні» сияқты танымал графикалық топтамалары, сондай-ақ портреттер мен абстракциялар бейнеленген кескіндемелік кенептері қойылған. Көрме бесінші қыркүйекке дейін ашық болады.
