2026 жылдың 1 шілдесінде Almaty Museum of Arts заманауи өнердің ең ықпалды тұлғаларының бірі, видеоарттың негізін қалаушы Билл Виолаға арналған «Билл Виола: Уақыт кеңістігі» көрмесін ашады. Бұл – Орталық Азиядағы осындай деңгейдегі алғашқы ірі жоба.
Билл Виола видео форматын дербес өнер туындысы деңгейіне көтерген шебер ретінде тарихта қалды. Енді Қазақстан мен аймақ көрермендері оның бай мұрасымен тұңғыш рет жақынырақ танысуға мүмкіндік алып отыр. Келушілер назарына суретшінің The Reflecting Pool (1977–1979), The Greeting (1995), The Raft (2004) және Tristan’s Ascension (2005) сияқты атақты жұмыстары ұсынылады.
Билл Виоланың шығармаларында видео құрғақ кадрлардың тізбегі емес, көрерменнің ішкі сезімімен ұласып жататын тұтас бір кеңістікке айналады. Жарық, дыбыс, ауқым, ырғақ пен адамның қозғалысы бір-бірімен үйлесіп, жан дүниеге ерекше әсер сыйлайтын тірі ортаны қалыптастырады. Бұл туындылар осыған дейін Нью-Йорктегі MoMA, Лондондағы Tate, Париждегі Centre Pompidou және Guggenheim Bilbao сияқты әлемге әйгілі мұражайларда талай рет жұртшылық назарына ұсынылған.
Жоба Almaty Museum of Arts мұражайының «Ұлы Дала» залында өтеді. Көрермен автордың терең ойлы әлеміне толық енуі үшін бұл бөлме арнайы иммерсивті ортаға айналмақ. «Билл Виола: Уақыт кеңістігі» көрмесі 2026 жылдың 1 шілдесінде басталып, 2027 жылдың 17 қаңтарына дейін жалғасады.
