Урбанизация мен өмірдің қарқынды ырғағы табиғат аясында демалуды нағыз сән-салтанатқа айналдырды. Біреулер хайкингті таңдаса, енді біреулер жаһандық трендке ілесіп, бау-бақша күтіміне және фермерлік ауыл өміріне бет бұрды. Осыдан біраз жыл бұрын ғана «қызанақтың қай сұрпын отырғызған дұрыс?» деген әңгіме тек саяжай маусымымен немесе аға буын өкілдерімен байланыстырылатын. Ал бүгінде жеке бақша, шағын атыз бен үйдегі жылыжай – ең танымал lifestyle-трендтердің бірі. Балконда көкөніс өсіру, аула күтімімен айналысу, фермерлік өнімдерді таңдай білу және маусымдық тағамдарды тұтыну заманауи өмір салтының міндетті атрибутына айналғандай.
Мұның бірнеше себебі бар, соның ең бастысы – цифрландыру. Экраннан шаршаған және өмірінің басым бөлігі онлайн өтетін қоғам бүгінде шынайы, қолмен ұстауға болатын дүниелерге көбірек ұмтылады. Өз қолыңмен насыбайгүл өсіру, алғашқы құлпынай егінін жинау немесе кішкентай дәннен тіршіліктің қалай оянып жатқанын бақылау – адам жанына керемет тыныштық сыйлайтын процесс. Бау-бақша күтімі медитацияның жаңа формасына, өмір ырғағын бәсеңдетіп, уақытты қайта бақылауға алудың таптырмас тәсіліне айналып үлгерді.
Бақша эстетикасы қала сыртындағы саяжайлардың аумағынан әлдеқашан асып кеткен. Бүгінде ол интерьер дизайнерлерін, шеф-аспаздарды, сән брендтерін және тіпті тұтас қонақүй жобаларын шабыттандырып отыр. Жергілікті өнім, маусымдық тағам, табиғатпен байланыс және өнімге деген құрмет – жақсы талғамның жаңа көрсеткіштері. Дәл осы трендтердің тоғысқан тұсында Алматыда биылғы жаздың ең қызықты жобаларының бірі дүниеге келді.
[baq] дегеніміз не?
Қазақстандық Messa бренді мен алматылықтардың сүйікті орнына айналған Fika кафесі бірігіп, жаңа заманның қалалық жылыжайын – [baq] жобасын ұсынды. Ол Villa Boutiques & Restaurants аумағында орналасқан. Жаз бойы жұмыс істейтін бұл кеңістік кәдімгі достық пен «ал, кеттік!» деген қарапайым сөзден бастау алған. Әсем Беделова мен Инга Макогон екі брендтің басын қосатын ортақ нүктені ұзақ іздегендерін жасырмайды.
«Біз жазғы поп-ап жасайтынымызды нақты білдік, бірақ оның концепциясын ұзақ ойландық. Ақыры басты назарды жылыжай мен бау-бақша идеясына аударуды ұйғардық. Ол үшін Копенгагендегі Noma-дан бастап Лос-Анджелестегі Flamingo Estate-ке дейінгі бірнеше мысалды зерттеп шықтық. Бұл ойымды бірден Ингаға айттым, өйткені идея Fika концепциясымен тамаша үйлесіп тұр еді (кафенің өз жылыжайы бар)», – дейді Әсем.
Жобаны команда мүшелері өздері қолға алған. Әсем мен Инганың бұл бастамасына жолдастары – Қуат Төленбаев пен Макар Макогон үлкен қолдау білдірді. Достары да шет қалмады: сәулетші Ахат Байменов құрылыс шешімдеріне жауап берсе, визуалдық бөлім мен ас мәзірін Әсем және Fika командасы дайындады.
Гастрономия, табиғат және ерекше жазғы атмосфераны тоғыстырған [baq] кеңістігі осылайша пайда болды. Қалалық жылыжайдың мөлдір шатыры астында жайлы кафе орын тепкен. Мұндағы ас мәзірінің басты кейіпкері – артық түсіндіруді қажет етпейтін таза өнімдер. Жобаның негізгі концепциясы Fika-ның жеке жылыжайы мен жергілікті фермерлерден алынған көкөністерге, жидектер мен шөптерге, сондай-ақ тамаққа деген барынша шынайы көзқарасқа құрылған. Қарапайым көріністің артында мұқият ойластырылған гастрономия жатыр. Мұнда әрбір тағам ерекше ілтипатпен дайындалады, ал маусымдық ерекшеліктер шектеу емес, қайта шабыт көзіне айналады. Ферментация, жергілікті өнімдер, ашытқыдан жасалған тартин және алкогольсіз бар – осының бәрі жоба философиясының табиғи жалғасы іспеттес.
[baq] жобасының басты құндылығы тек дәмді аста ғана емес. Бұл – қаланың тынысын өзгертетін ерекше кеңістік. Онда әсемдік, өзіңе деген қамқорлық, өмірдің баяу ырғағы мен қаладан ұзамай-ақ оның шуынан бір сәтке демалу мүмкіндігі тамаша үйлесім тапқан. Әсем мен Инга биылғы жазда қонақтар мүлдем жалықпайды деп уәде береді – кафе аумағында шағын кинотеатр жұмыс істеп, диджейлер өнер көрсететін болады.
«Біз бұл нағыз жазғы поп-апта қонақтарымызды дәмді аспен қуантып қана қоймай, оларға көңілді демалыс сыйлаймыз», – деп түйіндеді жоба авторлары.
