Испания тек жасыл алаңда ғана мықты емес. Бұл ел дәм талғамы жағынан да талайды тамсандырып келеді. Ерекше климаты мен көркем табиғатының, сондай-ақ ғасырлар бойы сақталған дәстүрінің арқасында мұнда ірімшіктің 100-ден астам түрі жасалады. Сол себепті Испания баяғыдан-ақ Еуропадағы тамаша дәм іздегендер жиі баратын орталықтардың бірі саналады. Әрине, олардың барлығының дәмін бірдей татып көру мүмкін емес, оның қажеті де жоқ. Алғашқы таныстық үшін ең танымал бес түрімен шектелген жөн. Осы ірімшіктердің дәмін татып-ақ, Испанияның бай тарихы мен мәдениетін толық сезінуге болады.
Манчего – Ла-Манчаның төресі
Бұл жай ғана ірімшік емес, елдің нағыз мақтанышы. Испанияға жасалған кез келген гастрономиялық саяхат дәл осыдан басталады. Ол Ла-Манча аймағында тек манчего тұқымды қойдың сүтінен жасалады. Оны сыртындағы өрілген себеттің ізіне ұқсайтын ирек өрнегі арқылы оңай ажыратуға болады. Жас манчегоның дәмі жұмсақ әрі кілегейлі келсе, ұзақ сақталған түрінен жаңғақ пен карамельдің дәмі сезіледі. Бұл ірімшіктің тарихы әдебиетпен де тығыз байланысты: Сервантес өзінің «Дон Кихот» романында оны ерекше атап өткен. Оны дастарқанға міндетті түрде айвадан (беже жемістерінен) жасалған қою мембрильо пастасымен бірге ұсынады. Бұл – еш өзгеріссіз, дәл осылай берілуі тиіс нағыз дәстүрлі дәм.
Кабралес – Астурияның тентегі
Егер манчегоны ірімшіктің төресі десек, кабралесті нағыз тентекке теңеуге болады. Бұл – Испанияның ең танымал көк ірімшігі. Ол теңіз деңгейінен 1500 метр биіктіктегі, ылғалдылығы 90%-ға жететін Пикос-де-Эуропа тауларының әктасты үңгірлерінде пісіп жетіледі. Басқа ірімшіктерге қарағанда, мұндағы көк тамырлар жасанды қоспаның емес, табиғи процесте пайда болатын зеңнің нәтижесі. Соған орай оның дәмі де өте өткір, қанық әрі ерекше. Мұндай ірімшік бір бокал тәтті херес шарабымен тамаша үйлеседі.
Тетилья – Галисияның нәзіктігі
Бұл атау испан тілінен аударғанда «кішкентай омырау» деген мағына береді. Расында да, конус пішінді тетилья басқа ешбір ірімшікке ұқсамайды. Испанияның солтүстігіндегі шүйгін жайылымдарда жайылған сиырдың сүтінен жасалатын бұл ірімшік өте нәзік. Оның дәмі жұмсақ, кілегейлі, лимон мен жас шөптің жеңіл дәмі білінеді. Тетильяның кейбір түрлері небәрі жеті күнде дайын болады. Оны ірімшік әлеміндегі haute couture деуге әбден негіз бар, себебі мұнда әрбір бөлшек маңызды әрі артық ештеңесі жоқ.
Идиасабаль – Баск елінің хош иісі
Баск елі мен Наварраның мақтанышы саналатын бұл ірімшік жергілікті латча және каррансана қойларының сүтінен жасалады. Оның басты ерекшелігі – бойына сіңген табиғи түтіннің дәмі. Бұл дәстүр таудағы бақташылардың күркелерінен бастау алған. Олар ірімшікті төбеге іліп қоятын, осылайша ол ашық ошақтың түтінімен біртіндеп ысталатын болған. Нәтижесінде өзіндік тарихы мен қайталанбас хош иісі бар ерекше ірімшік дүниеге келген.
Маон – Менорканың шуақты күні
Осы тізімдегі жалғыз арал ірімшігі – Балеар архипелагына кіретін Менорка аралында өндірілетін маон. Оны басқалардан ажырату өте оңай: пішімі төртбұрышты, шеттері дөңгелене келген, ал сырты ашық қызғылт сары түсті. Пісу барысында ірімшіктің сыртына зәйтүн майы мен пиментон (жергілікті ысталған паприка) жағылады. Дәл осы паприка оған қанық түс пен жеңіл дәмдеуіштің хош иісін береді.