We Are Ona

We Are Ona – «аудиториялар мен брендтер арасындағы эмоционалды байланысты нығайтатын әсер жасауға» бағытталған студия. Негізін 2019 жылы Лука Пронзато қалаған. Танымал NOMA Copenhagen мейрамханасында жұмыс істеген Пронзато мырзаның компаниясы бүгінде Gucci үшін дастарқан жаюдан бастап, дизайнер Саймон Порт Жакемус секілді талғампаздардың үйлену тойына дейінгі іс-шараларды ұйымдастырады.

We Are Ona-ның екі ерекшелігі бар. Алғашқысы жергілікті өнімдерге басымдық беруінде болса, екіншісі командадағы аспаздардың сан алуандығында. Колледжен кеше шыққан жаңа аспаздардан бастап, Мишлень жұлдызын тағынған әккі мамандар бір асүйдің ішінде еңбек етеді. Халықаралық поп-ап шаралары үшін олар француз аспаздарын тартса, Париждегі той-томалаққа халықаралық деңгейдегі аспаздарды шақырады.

We Are Ona командасы Hermès, Chanel, Saint Laurent, David Zwirner және Coperni секілді мүйізі қарағайдай клиенттерге жылына 100-ге жуық іс-шара өткізеді. Мұның қатарында көркемөнердің халықаралық көрмесіне айналған Венеция биенналесі мен Базель, Майами және Париждегі Art Basel заманауи өнер жәрмеңкелері сынды мәдени іс-шаралар бар. 

We Are Ona-ға тән тағы бір қызық артықшылық – ешкім білмейтін, тіпті жергілікті тұрғындарға да бейтаныс локацияларда шаралар ұйымдастыруы. Мысалы, Венеция биенналесі үшін олар сәнді палаццоны емес, жұрт назарына түспеген, тозығы жеткен ғимаратты таңдаған. Осылайша жұрт назарын аударып, жадында мәңгі қалатын шоу жасауға ұмтылып келеді.

Gohar World

Gohar World – Нью-Йоркте орналасқан компания. 2020 жылы апалы-сіңілі Лейла мен Надя Гохар құрған. Олар Cartier, Hermès, Prada, Gucci және Dries Van Noten сияқты беделді брендтер үшін тамақ пен өнер үйлесім тапқан айрықша гастрономиялық жобаларды жасайды.

Лейла 15 жылдан бері «үстел дизайнын» зерттеп, кешкі ас пен кейтерингке қатысты жобаларды құрастырып келген. Мейрамханада жұмыс істеп жүріп, Gohar World бағдарламасын дамытып, аспаздық дизайнның шеберіне айналған.

Gohar World эстетикасы сюрреалистік сипатқа ие: үстелдердің біресе крахмалдан жағасы болса, енді бірде тұтас көйлегі болады. Аспалы шамдардан жұмыртқа да салбырап тұруы мүмкін. Ал багеттерді жебе қадалған атлас қаптардан табуыңыз мүмкін. Cоған қарамастан, үстел үстіндегі тәртіп маңызды элементтердің бірі болып қала бермек.

Апалы-сіңілі Гохарлардың үстел әрлеуіне қажет ерекше заттар сататын интернет-дүкені де бар. Онда багет пен шұжық пішінді шамдар, сарымсақ губкалары мен жұмыртқа кейіпті аспалы шамдарға дейінгі түрлі дүниені табуға болады. Әжептәуір практикалық бұйымдарды да байқауыңыз мүмкін. Мысалы, кестеленген зығыр дастарқан мен қайталанбас ас үй құралдары да осы дүкеннің сөрелерінде тұр.

Қорыта айтқанда, Gohar World — күнделікті өмірдің күйбең қарбаласында да ішіңізді пыстырмайтын әлем жасаудың хас шеберлері.

Ananas Ananas

Ananas Ananas – Вероника Гонсалес пен Елена Петросян негізін қалаған инновациялық тағам өнері студиясы. Лос-Анджелес пен Баха Калифорнияда орналасқан студия бүкіл әлем бойынша жеуге жарамды арт-инсталляциялар жасайды.

Олардың шығармашылық тәсілі тағам ұсыну процесінен-ақ өзгешеленеді. Дәстүрлі табақтардың орнына ерекше бұйымдарды қолдану – олардың басты ерекшелігі. Мысалы, олар шағын көкөністерді қонақ алдына әкелгенде лазермен кесілген металл шампурларды пайдаланса, саңырауқұлақтар үшін абажурларды (шамға арналған сәндік бұйым) кәдеге жаратқан.

Студия Милан сән апталығы секілді мәдени іс-шараларда белсенділік танытып, үлкен танымалдылыққа ие болды. Бір кездері олар Dos Puntos сериясы аясында азық-түлік инсталляциясы бар аперитив бақшасын жасап, жұртшылық назарын өзіне аударған болатын.

Ananas Ananas студиясы көрермендерді тағам өндірісіне қатысты қалыптасқан ережелерді қайта қарауға және азық-түлік ысырабына қарсы күресуге шақырады.