Бельгиялық шеф-аспаз Вики Гюнестің Қазақстанда БеНиЛюкс сауда палатасының қолдауымен өткен эксклюзивті кешкі астардағы аспаздық тәжірибесі туралы айтып береміз.
Вики Гюнес – арнайы білімсіз, өз бетімен шеберлігін шыңдаған аспаз, көптеген беделді марапаттардың иесі. Оның Zilte мейрамханасы Michelin-нің үш жұлдызымен марапатталған. Ал 2024 жылдың қараша айында ол Best Chef Awards сыйлығында аспаздық индустрияға қосқан ерекше үлесі үшін «қос пышақпен» марапатталды. Біз Викиден мансабы, жауапкершілігі және Қазақстандағы гастрономия туралы сұхбат алдық.
Жоғары аспаздық өнер әлеміне қалай келдіңіз?
Барлығы шығармашылық пен дәлдікке деген құмарлықтан басталды. Мен инженер-акустик болуға ұмтылып, өндірістік ғылымдарды оқыдым. Алайда өз орнымды гастрономиядан таптым. Аспаздық өнерді өз бетімше үйреніп, 1996 жылы жұбайым Вивианмен бірге алғашқы мейрамханамызды аштық.
Менің мансабымдағы маңызды кезеңдер деп Zilte мейрамханасын Бельгияның Антверпен қаласындағы «Өзендегі музейге» (MAS) көшіру мен Michelin-нің үшінші жұлдызын алуды айтар едім. Соңғысын жылдар бойғы қажырлы еңбек, тәжірибе және дамуға деген ұмтылыстың нәтижесі деп бағаласа болады.
1 / 2
Инновациялық тағамдарды дайындауға шабыт қайдан келеді?
Маған саяхаттар, жаңа өнімдер және күтпеген сезімдер шабыт береді. Zilte мейрамханасында біз әрдайым өзімізге: «Біздің қонақтарымыз не сезінеді?» деп сұрақ қоямыз. Бұл тәсіл бізге тағам арқылы оқиғаларды баяндап, естеліктерді еске түсіріп, эмоциялардың оянуына мүмкіндік береді.
