Сарыарқа жақұты

The Story барының коктейльдер картасын аша қалсаңыз, автордың қазақ даласының түкпір-түкпіріндегі көрікті жерлерден шабыт алғанын бірден байқайсыз. «Күн адамы», «Айқай құм», «Көлді шатқал», «Шөл даладағы оазис», «Ғарышқа жол» сынды атауларына қарап отырсаңыз, қасиетті даланың сан қатпарлы тарихына сапар шегіп, уақыт машинасына пара-пар сиқырлы эликсир ішкендей күй кешесіз.

«Тарихы терең, табиғаты көркем Сарыарқаның жақұты Қарқаралы болса керек. Қысы қаһарлы аймақта шоқ-шоқ қарағай өседі екен», — дейді дайын коктейльді аталған ағаш бүрімен әрлеп жатқан бармен. Интерьері винтаж бұйымдармен толтырылған бар залының анау бір бұрышында тұрған ескі граммофоннан Мәдидің әні естілді бір кезде: «Атыңнан айналайын, Қарқаралы».

Рецепт авторы: The Story барының ұжымы

Құрамы:

Қарағай бүрі тосабы қосылған арақ — 30 мл

Құрғақ вермут — 15 мл

Тәтті вермут — 15 мл

Лайм кордиалы — 20  мл

Жалбыз қосылған түймедақ шайы — 35 мл

Дайындау әдісі:

1. Арақты тосап құрамындағы қарағай бүрімен тұндырамыз.

2. Түймедақ шайын жалбыз қосып қайнатамыз.

3. Қарағай бүрі тосабын қосамыз.

4. Лайм кордиалын құйып, бәрін бірдей мөлшерде араластырамыз.

5. Коктейльді мұз толтырылған шыныға құйып, қарағай бүрімен безендіреміз.

Chocolate glacé

Қиял-ғажайып ертегісіндей сиқырлы қыс атмосферасын бір сәт елестетіңізші. Көктен жапалақтап жауған ақ ұлпаға жанарыңды алмай қараған сәт пен ыстық шоколад ішкен кинодағыдай бір кадр көз алдыңызға келді ме?! Ал енді осы көріністі қарама-қайшы бір суреттемемен көркемдесек, қалай болады? Мысалы, жүрегінде оты лаулаған кубалықтардың қасиетті сусыны роммен араластырсақ? French 42 бары қысқы коктейльдер картасын жасарда осы сұрақтың жауабын іздеген секілді.  

Әуелі қос алақанмен қыздыратын old-fashioned бокалдағы қою ром мен жұпар иісті ликёрдің бал татқан дәмі қанды қыздырып, жүректі тулатса, какао мен шоколадты печенье шәрбатының дәмі мерекелік көңіл күйді шарықтар шыңына жеткізеді.

Рецепт авторы: French 42 бармені Сергей Конченко

Құрамы:

Havana club Cuban spiced ромы — 30мл 

Какао ұнтағы — 3 г

Құрғақ сүт — 1,5 г

Bumbu ром ликёрі — 30 мл

White cacao ликёрі — 15 мл

Frangelico ликёрі — 10 мл

Шоколадты печенье шәрбаты — 20 мл

Жұмыртқа ақуызы — 20 мл

Дайындау әдісі:

1. Ромға какао ұнтағы мен құрғақ сүт қосып, біркелкі ерігенше араластырамыз.

2. Сосын ликёрлерді құямыз.

3. Оған шоколадты печенье шәрбатын қосамыз.

4. Барлығын мұзбен бірге шейкерде шайқаймыз.

5. Мұз салынған шыныға құйып, маршмеллоумен әрлейміз.

Givré

Givré сөзінің қазақша баламасы «аяз салған өрнек» дегенге келеді. Осыған қарағанда Astra Grand Café бармендері бақытты балалық шақты еске салар сусын ойлап табуды мақсат тұтса керек.

Олар таңертең жылы төсекте оянып, қырау қатқан терезеден ертегі әлеміне енгізер мұз сарайының шілтерлі пердесін көргеніне сенетін періште болмыс шақтардың суретін дәм арқылы салғандай дерсің.

Цитрус қабығының жұпары, кокос нәзіктігі мен соңғы нота іспетті шоколад тәттісі тоғысып, ақ қанат қиял мен бала арманның коктейль тамшысындағы интерпретациясындай әсер қалдырады.

Рецепт авторы: Astra Grand Café бартендерлері Анатолий Белкин мен Алияр Беркутов

Құрамы:

Кокос майы қосылған джин — 40 мл

Fino хересі — 10 мл

Лимон мен эвкалипт кордиалы — 30 мл

Апельсин ликёрі — 10 мл

Шымырлы шарап сплэші — 20 мл

Дайындау әдісі:

1. Алдымен 0,5 мл джин мен 0,05 г кокос майын араластырамыз.

2. Жылы жерде 2 сағатқа қалдырамыз.

3. 6 сағат мұздатқышта ұстаймыз да, кейін кофе фильтрі арқылы сүземіз.

4. Алынған сұйықтықты 0,003 г анчанмен араластырып, 1 сағат жылы жерге қоямыз, кейін сүзгіден өткіземіз.

5. 5 лимон цедрасы мен 0,005 г қақталған эвкалиптіні 0,5 қант шәрбатымен араластырамыз.

6. Қайнауға жеткізбей қыздырып, үстін пергаментпен жабамыз.

7. Суығанша күтеміз де, алма қышқылы ерітіндісімен араластырамыз.

8. Барлығын шейкерде шайқаймыз.

9. Арнайы коктейль шынысына құямыз да, шымырлы шарап сплэшін ақ шоколадпен безендіреміз.

Мәңгі есте қалар мерекелік кеш ұйымдастыру — көп адамның арманы. Бұл коктейльдер ерекше дәмімен ғана емес, сонымен қатар қай-қайсысы да айтпақ ойы мен ішіне бүккен сырымен де ерекшеленеді. Bee’s Knees коктейлінің тропик жұпар иісі, Fuji-дің жапон философиясындағы үйлесімділікпен ұштасуы, Сарыарқа жақұтының ұлттық нақышы, Chocolate Glacé-ның қысқы ертегі атмосферасы мен Givré коктейлінің шаттыққа толы балалық шақты еске салатын нәзік дәмі кешіңізді әсем естеліктермен өрнектей түсері анық. Жаңа жылға арналған осы рецептілерді қолдана отырып, өзіңізге және жақындарыңызға ұмытылмас әсер сыйлаңыз!